Jon 2 | NdeIBE | STEP | Ephakathi kwenhlanzi uJona wathandaza kuJehova uNkulunkulu wakhe.

Jonah 2

Umthandazo KaJona

1 Ephakathi kwenhlanzi uJona wathandaza kuJehova uNkulunkulu wakhe. 2 Wathi: “Ekuhluphekeni kwami ngambiza uJehova, wangiphendula. Ngisekujuleni kwengcwaba ngacela uncedo, wena wakulalela ukukhala kwami.

3 Wangiphosela ezinzikini, phakathi emathunjini ezilwandle, amagagasi agubhazela emaceleni wonke; wonke amagagasi akho lezimpophoma zawo kwangisibekela.

4 Ngathi, ‘Sengixotshiwe ebusweni bakho; kodwa ngizakhangela njalo ethempelini lakho elingcwele.’

5 Izindonga zamanzi zaziqonde ukungimbokotha, ngangihanqwe yinziki; inkunkuma yotshani bolwandle yangithandela ekhanda.

6 Ngagalula ngatshona ezimpandeni zezintaba; umhlaba ongaphansi wangivalela okwaphakade. Kodwa wena wayikhupha impilo yami egodini, hawu Jehova, Nkulunkulu wami.

7 “Lapho impilo yami yayisincipha, ngakhumbula wena, Jehova, umthandazo wami waphakamela kuwe, ethempelini lakho elingcwele.

8 “Labo ababambelela ezithombeni ezingelamsebenzi balahlekelwa ngumusa ongaba ngowabo.

9 Kodwa mina, ngizakuthi ngihlabela ingoma yokubonga ngenze umhlatshelo kuwe. Engikufungileyo ngizakugcwalisa. Insindiso ivela kuJehova.”

10 UJehova walaya inhlanzi, yona yase imhlanza uJona emhlabathini owomileyo.